நேர்மையாளர் உயர்திரு.உ.சகாயம் இ.ஆ.ப ( வி.ஓ ) அவர்களின் சீரிய சிந்தனையில் உதயமாகி , தமிழ்ப்பணி புரிவதற்காக 19.09.2019 அன்று முதல் தமிழ் முற்றம் என்ற திட்டம் தொடங்கப்பட்டது. அதன் ஒரு அங்கமாக ஆங்கிலம் கலவாத எளிய, இயல்பு தமிழ் உரை நிகழ்த்தும் இந் நிகழ்வானது தொடர்ந்து வெற்றிகரமாக 100-வது வார நிகழ்வை நோக்கி வீரியத்துடன் நடந்து கொண்டிருக்கிறது.

இதன் அடுத்த கட்டமாக உலகெங்கும் வாழும் தமிழர்களை ஒருங்கிணைத்து தமிழ் மொழியை அனைத்து தளங்களிலும் வளர்த்து , வருங்கால தமிழ் தலைமுறையினரின் நெஞ்சில் தமிழ்க் கனலை சுடரவிட்டு எரியச் செய்யும் நெடுங்கனவை நோக்கமாக கொண்டு தமிழ் முற்றம் பயணிக்கிறது.

இலக்கு:

• தமிழ்மொழியின் பயன்பாட்டினை தமிழர்களின் வாழ்வியல் தளங்கள் அனைத்திலும் உறுதிப்படுத்தவும், அதிகரித்திடவும், அதனை ஒட்டிய தேவையான அனைத்து செயல்பாடுகளையும் மேற்கொள்ளுதல்.
• தமிழ் மண், மரபு, பண்பாடு, மொழி இன்னும் பிற கூறுகளில் தேவையான அனைத்து நடவடிக்கைகளையும் மேற்கொள்ளுதல்.
• தமிழர்தம் அன்றாட உரையாடல்களில் ஆங்கிலம் உள்ளிட்ட பிறமொழிக் கலப்பின்றி எளிய தமிழ் பேசுவதை உறுதி செய்தல்.
• தமிழகத்தை தாண்டி உலகெங்கும் வாழும் தமிழர்களின் அகவாழ்வுத் தளங்களிலும், இயன்றவரை புறச்சூழல்களிலும் தமிழ்மொழியை பயன்படுத்துவதை ஊக்கப்படுத்துதல், மற்றும் உறுதி செய்தல்.
• தமிழர்தம் அறிந்த மற்றும் அறியப்படாத பெருமைமிகு தொன்மையையும், வரலாற்றையும் ஆய்வு செய்து, வெளிக் கொணர்ந்து, அவற்றை தமிழர்களிடத்தில் மட்டுமல்லாது உலக மக்கள் அனைவரிடத்திலும் எடுத்துச் செல்லுதல்.
• தமிழ் பேரறிஞர்கள் எழுதிய தமிழ்மொழிப்பற்றிய ஆய்வு நூல்களையும், இன்னும் பிற நூல்களையும் பதிப்பித்து அவர்களை உரிய வகையில் ஊக்கப்படுத்துதல். உலகெங்கும் உள்ள தமிழர்களுக்கு இவ்வரிய தமிழ் நூல்கள் கிடைத்திட வழிவகை செய்தல்.

• தமிழர்களின் அரிய கலை வடிவங்களான இசை, நடனம், ஓவியம், சிற்பம் போன்றவற்றையும், இன்னும் பிற கலைகளையும் பாதுகாத்திடவும், மேலும் வளர்த்திடவும் உரிய செயல்பாடுகளை மேற்கொள்ளுதல். இக்கலை வடிவங்களில் உரிய ஆய்வுகள் மேற்கொண்டு அவற்றை செம்மைப்படுத்துதல். மேலும், இன்ன பிற பண்டைய நாகரீகங்களின் கலை வடிவங்களோடு நமது தமிழ்க்கலைகளை ஒப்பீடு செய்து, இவற்றிடையே உள்ள பொதுத்தன்மையை கண்டறிந்து வெளிப்படுத்துதல்.
• பண்டைய தமிழ் ஓலைச்சுவடிகளை சேகரித்தல், பாதுகாத்தல், பகுப்பாய்வு செய்து வெளிக்கொணருதல். அவற்றில் உள்ள அறிவியல் உண்மைகளை தற்காலப் பயன்பாட்டிற்கு கொண்டு வருதல்.
• பண்டைத் தமிழரின் அறிவியல், தொழில்நுட்ப வெளிப்பாடுகளை ஆய்வுகள் செய்து அவற்றில் பொதிந்துள்ள அறிவியல் உண்மைகளை வெளிக்கொணருதல். இதன் வழியாக அவற்றை இன்றைய பயன்பாட்டிற்கு எடுத்துச் செல்லுதல். குறிப்பாக, பண்டைத் தமிழர்தம் தொழில்நுட்பத் திறனிற்கு சான்றுகளாக உள்ள கட்டிடக் கலை, கப்பல் கட்டுமானம், வானவியல், நீர் மேலாண்மை, வேளாண்மை, பொருள் அறிவியல், முதலானவை குறித்து ஆய்வுகள் மேற்கொண்டு, இத்திறன்களை மீட்டுருவாக்கம் செய்தல்.
• பண்டையத் தமிழர் விளையாட்டுகள் குறித்த தகவல்களை ஓலைச்சுவடிகள், கல்வெட்டுகள், இலக்கியங்கள், இன்னும் பிற ஆதாரங்களிலிருந்து சேகரித்து, அவற்றை மீட்டுருவாக்கம் செய்து, வெளியுலக பயன்பாட்டிற்கு கொண்டு வருதல், பரப்புதல்.
• தமிழர்களின் மரபு வழித் தற்காப்புக் கலைகளான, சிலம்பாட்டம், வர்மக்கலை, களரி, அடிமுறை போன்றவற்றை மீட்டுருவாக்கம் செய்தல். அவைகளை தமிழர்களிடத்தில் வெகுவாக பரப்புதல், அவைகளுக்கு உலகளவில் உரிய அங்கீகாரம் கிடைக்க முயற்சிகள் மேற்கொள்ளுதல்.
• தமிழர்களின் மரபுவழி விழாக்கள் மற்றும் நிகழ்வுகள் தொய்வில்லாது தொடர்ந்து நடத்த முயற்சிகள் மேற்கொள்ளுதல்.
• தமிழர்களின் மரபுவழி விழாக்கள் மற்றும் நிகழ்வுகள் தொய்வில்லாது தொடர்ந்து நடத்த முயற்சிகள் மேற்கொள்ளுதல்.